مساء الخير ,,,,صباح الخير ,,,,السلام عليكم ورحمة الله وبركاته 
واجب تدويني ,,,مع اني ما بحب اكتب واجبات,,,وعمري ما أخدت علامه كامله,,,ودايمن واجباتي كنت مقصره فيها 
أعتقد لحد هون وبيكفي ,,,عذاب ,,,عذاب ,,,عذاب ليه يا دنيا العذاب ,,,طبعا بصوت فريد الاطرش 
اعتقد اخدتو فكره عني وانا تلميذه ,,,مش منتظمه ولا منظمه ,,,بس هيه روح المرح وطبيعتي الاجتماعيه كانت تحبب الناس فيي
وطيبة قلبي طبعا(الحمدلله) لسه موجوده
المهم من المواقف الي بتزكرها وانا صغيره نزول فلم خلي بالك من زوزو ,,,,,فلم عملولوا دعايه غير شكل وكونا سكان الزرقاء وعنا سينمات كثيره يعني بتزكر فوق العشر يمكن او 8 هيك شي المهم نزل الفيلم والناس بلشت تحكي عنو وكان قبلوا نازل فلم ابي فوق الشجره 
إلي أساء للسينمات طبعا لأنه يحتوى على عدد من المشاهد الي هيه كانت ولا زالت تغضب ربنا بس بيضلوا يقولوا تمثيل ,,,نزل الفلم في وقت سيء السمعه للسينمات ,,,وانا كل ما أمر من عند سينما بشوف دعايات وناس فايته طالعه من السينما وسعاد حسني وحسين فهمي يعني اشي اشي ووووأغاني ورقص ,,,يعني فلم ما بيتفوت ابدا ,,,والدنيا عيد ,,,,طبعا كنا قبل نروح مع أخواتنا الكبار ياخدوا منا عيدياتنا كلها ويقطعوا منها تذاكر إلهم الكبار ويشتروا بزر وسندويشات وبيبسي وكل شي ونحنا نفوت عالسينما تهريب طبعا لأنو ممنوع الصغار يفوتوا ,,,المهم ما لئيت حد ممكن ياخدني عالسينما ,,,,لأنو ممنوع ولازم احضر الفيلم ,,,,اجتهدت وقطعت فتوى لنفسي ,,وجمعت البنات الي اكترهم اصغر مني ,,,ورحنا السينما ودخلنا الفيلم بس رحنا حفلة المساء عالساعه السادسه طبعا زمان كانت السينما تعرض اول فلم اجنبي كاوبوي وبعدين فيلم كراتيه وبعدين رومانسي وكل هاد الوقت ونحنا جوه السينما وساعه تروح وساعه تيجي والي صارت تبكي بدها تروح والي بتقول لي هلا اهلي بيدبحوني بس انا حجايه احضر الفيلم خلي بالك من زوزو ومن السادسه للساعه الحاديه عشر وطلعنا من السينما وروحنا بنص الليل ووصلنا الحاره وشفنا الحي مقلوب فوقاني تحتاني والكل بره من آباء ةابناء وأمهات والرعب على وجوههم وتعالوا شوفوا وجهي كيف صار اصفر اخضر بيتنجاني طبعا هاد لسه من الخوف 
وبلعت ريقي 
واتقدمت لازم اكمل دوري البطولي ,,,طبعا قبل ما احكي اي شي كان السؤال وين كنتوا ,,,,بالسينما كنا عم نحضر فيلم خلي بالك من زوزو ,,,,وهات يا ضرب جماعي وشد شعر وقتلة من الاخر اشي شلاليت اشي كفوف اشي قرص وما بعرف من وين كان الضرب ييجي ,,,يعني تلاته ايام وانا كل يوم بتبهدل وما حد قدر اني بحب الفن ولا السينما وما حد قال يا جماعه البنت موهوبه 
لو اني طلعت فنانه مشهورة وحكيت القصه هاي كان اعتبروها نضال مشرف في سبيل الفن 
المهم تنسوش انو سمعتي ساءت جدا في الحاره وأصبحت امشي وأصابع الاتهام توجه لي إني بنت شريره ومش مربيه 
بس احكيلكم شي 
الفيلم كان بيستاهل 
ولسه بحب احضره 
وبحب السيما ,,,وبدي احضر فيلم قريب ان شاء الله